Dydd
Sul 28 Ionawr, a’r eira wedi dadmer, ymgasglodd 18 ohonom yn hen
chwarel Blaen Nanmor ar gyfer taith i gopa’r Cnicht. Braf iawn oedd
gweld fod hanner y fintai yn aelodau cymharol newydd – wedi bod ar
un neu ddwy daith o’r blaen neu wedi ail afael ynddi ar ôl
ysbaid o rai blynyddoedd. Efallai fod y disgrifiad o’r daith fel
un “fer” neu’r amser cychwyn gwaraidd (10 o’r gloch)
wedi cyfrannu at hyn!
Dyma gychwyn i fyny heibio Gelli Iago, gan oedi i amlinellu’r daith
ar y map mae’r Ymddiriedolaeth Genedlaethol wedi ei osod yno. Yna
codi’n raddol a chyson ar hyd llwybr hawdd hyd at Fwlch y Batel.
Troi i’r dwyrain wedyn a dilyn godre’r gefnen hyd at lecyn addas
i gael paned. Yna gyrru ymlaen am y grib ac ymuno hefo llwybr Croesor
ychydig dan gopa’r Cnicht. Erbyn cyrraedd y copa ‘roedd y cymylau
wedi cau amdanom a’r gwynt wedi codi ac yn brathu, felly doedd dim
amdani ond chwilio am rhywfaint o gysgod ar y ffordd i lawr i gael cinio
sydyn.
Ymlaen wedyn at Lyn yr Adar (trwy’r gors – roedd wedi glawio
digon yn yr wythnosau cynt!) cyn troi yn ôl i’r gorllewin a
dilyn llwybr clir rhwng y creigiau, i lawr heibio Llyn Llagi ac yn ôl
i’r ffordd ger Llwynyrhwch. Yn unol â’r addewid ‘roeddem
yn ôl yn y ceir am 2.30, hefo ambell i droed wlyb ond yn llawer
elwach o gael cwmni difyr ar y daith.
Ac ar gyfer y cofnod, y cwmni difyr hynny oedd: Llew, Gwyn, Bert, Elisabeth,
Iona, Morfudd, Awen, Aaron, Sian, Elen, Catrin, Martin, Jeremy, Delyth,
Bryn, Eirlys, Ruth a Dilys.
Aroddiad
Dilys Phillips
Dim lluniau eto (a oes gennych chi rai?)
Noddir
gan:
Llety ar
y wê gan:
